भोजपुर ५ बैशाख । सत्ता गठबन्धनबाट भोजपुरको रामप्रसादराई गाउँपालिका अध्यक्षमा माओवादीका थामबहादुर राई ‘निर्माण’ लाई अघि सारेको छ । यस गाउँपालिकामा उपाध्यक्ष नेपाली कांग्रेसलाई दिने सहमतिसहित तालमेल भएको हो । कांग्रेसले भने उपाध्यक्षको उम्मेदवार टुंग्याइसकेको छैन । रामप्रसादराई गाउँपालिका माओवादी नेता सांसद सुदन किरातीको गृहपालिका हो । निर्माण माओवादी प्रदेश १ का सदस्यसमेत हुन् । गोपाल खम्बु नेतृत्वको तत्कालीन खम्बुवान राष्ट्रिय मोर्चा हुँदै पछि किरात वर्कस पार्टी हुँदै माओवादी प्रवेश गरेका राई जनमुक्ति सेनाको सेक्सन कमाण्डरसमेत भए । २०६२ मा माओवादीले गठन गरेको जिल्ला जनसरकार प्रमुखको जिम्मेवारी पनि उनले लिएका थिए ।
७४ को चुनावमा पनि अध्यक्ष उठेका निर्माण ८ मतले एमालेसँग पराजित भएका थिए । एमालेका उम्मेदवार विजय राईले २३५६ मत ल्याउँदा निर्माणले २३४८ मत प्राप्त गरेका थिए । कांग्रेसबाट अध्यक्ष उठेका दिनेशकुमार कार्कीले १३२३ मत प्राप्त गरी तेस्रो भएका थिए । यस गाउँपालिकामा माओवादीबाट सम्झना राईले २५३२ मत ल्याएर उपाध्यक्ष जितेकी थिइन् ।
