युवराज विष्ट
भोजपुर, ९ असार।
भोजपुरको पौवादुङमा गाउँपालिकाले व्यावसायिक पशुपालनलाई प्रोत्साहन गर्दै किसान लक्षित रु. ६० लाख बराबरको कार्यक्रम सञ्चालन गरेको छ। स्थानीयलाई आत्मनिर्भर बनाउदै कृषिमा आधारित आयआर्जन वृद्धि गर्ने उद्देश्यसहित गाउँपालिकाले २१ वटा कृषि फर्मलाई अनुदान सहयोग प्रदान गरेको हो।
गाउँपालिकाका प्रमुख प्रशासकीय अधिकृत नवीन भट्टराईका अनुसार कार्यक्रमका लागि गाउँपालिकाबाट रु. ३० लाख बजेट विनियोजन गरिएको छ भने कृषकहरूको तर्फबाट पनि बराबरको रु. ३० लाख लागत साझेदारी गरिएको छ। यसरी कुल रु.६० लाखको लगानीमा कार्यक्रम कार्यान्वयन गरिएको उहाँले जानकारी दिनुभयो।
महिला विकास बोर्ड अन्तर्गत सञ्चालित ‘उपाध्यक्ष आत्मनिर्भर कार्यक्रम’ मार्फत वडा नं. ४, ५ र ६ का किसानलाई पशुपालनमा अनुदान सहयोग उपलब्ध गराइएको गाउँपालिका उपाध्यक्ष ज्योत्सना राईले बताउनुभयो। उहाँका अनुसार यसअघि सोही कार्यक्रममार्फत वडा नं. १, २ र ३ मा उन्नत जातका गाई वितरण गरिएको थियो । चालु आर्थिक वर्षमा बाँकी वडामा कार्यक्रम विस्तार गरिएको हो।
कार्यक्रमअन्तर्गत २० वटा बंगुरपालन फर्म र एक वटा बाख्रापालन फर्मलाई सहयोग गरिएको छ। किसानहरूको ५० प्रतिशत लागत साझेदारी रहने यस योजनामा खोर निर्माण, पाठापाठी (बंगुर तथा बाख्रा) खरिद र आवश्यक प्राविधिक सहयोगमा गाउँपालिकाले सहजीकरण गरेको जनाएको छ।
उपाध्यक्ष राईका अनुसार यस कार्यक्रमले विशेषगरी ग्रामीण क्षेत्रमा आयआर्जनका नयाँ अवसर सिर्जना गर्नुका साथै महिलाको आर्थिक सशक्तीकरणमा टेवा पु¥याउने अपेक्षा गरिएको छ।
“हामीले महिलालाई केन्द्रमा राखेर कार्यक्रम सञ्चालन गरेका छौँ,” उहाँले भन्नुभयो, “यसले घरपरिवारको आर्थिक अवस्था सुधार्न सहयोग गर्नेछ।”
गाउँपालिका अध्यक्ष किरण राईले गाउँपालिकालाई दूध तथा मासुमा आत्मनिर्भर बनाउने लक्ष्यसहित कार्यक्रम सञ्चालन गरिएको बताउनुभयो।
“हामीले दूध र मासुमा आत्मनिर्भर गाउँपालिका निर्माणको लक्ष्य राखेका छौँ,” अध्यक्ष राईले भन्नुभयो, “गत वर्ष गाई वितरण गरेपछि यस वर्ष बंगुर र बाख्रापालन कार्यक्रम विस्तार गरेका छौँ। अहिले उत्पादन भएको दूध भोजपुर सदरमुकामसम्म पुग्न थालेको छ।”
गाउँपालिकाको सहयोगमा आधुनिक खोर निर्माण गरी व्यावसायिक बंगुरपालनमा जुट्नुभएका स्थानीय बर्तामाया राईले अनुदानले उद्यम सुरु गर्न सहज भएको बताउनुभयो। उहाँले धरानबाट १० वटा उन्नत जातका बंगुर ल्याएर व्यवसाय सुरु गर्नुभएको छ।
यस्तै, लिलामाया राईले महिलामुखी कार्यक्रम प्रभावकारी भएको बताउँदै घरायसी काममा सीमित महिलाहरूलाई आयआर्जनको अवसर प्राप्त भएको बताउनुभयो।
गाउँपालिकाको लागत साझेदारीमा आधुनिक खोर निर्माण गरेर व्यावसायिक रुपमा बंगुरपालन थालेको स्थानीयबासी अनिता राईले बताउनुभयो । आफ्नो घरमा धरानबाट ल्याएका १३ वटा हेमसार बंगुर रहेको उहाँले जानकारी दिनुभयो । राम्रोढंगले फस्टाएको खण्डमा एउटा बंगुर रु. ५० हजारदेखी ६० हजारसम्ममा बिक्री हुने उहाँको भनाइ छ ।
स्थानीय कृषक जयमारानी राईका अनुसार अनुदान सहयोगपछि पशुपालनप्रति आकर्षण बढेको छ। “प्रारम्भिक लगानीमा सहयोग पाएपछि व्यावसायिक रूपमा अघि बढ्न सजिलो भयो,” उहाँले भन्नुभयो।
गाउँपालिकाले कृषिलाई आधुनिक र व्यावसायिक बनाउने लक्ष्यसहित यस्ता कार्यक्रमलाई आगामी दिनमा पनि निरन्तरता दिने जनाएको छ। पशुपालनमार्फत आय वृद्धि, रोजगारी सिर्जना र ग्रामीण अर्थतन्त्र सुदृढ बनाउने उद्देश्यले थप योजनाहरू ल्याइने गाउँपालिकाको भनाइ छ।
यस प्रकारका सहुलियत र साझेदारीमा आधारित कार्यक्रमले स्थानीयस्तरमै उत्पादन र आम्दानी बढाउँदै आत्मनिर्भर गाउँ निर्माणतर्फ महत्वपूर्ण योगदान पु¥याउने स्थानीय जानकारहरुको भनाइ छ ।
