भोजपुर, २८ असार । भोजपुरको पौवादुङमा गाउँपालिकाले उत्कृष्ट सामुदायिक विद्यालयलाई सम्मान गरेको छ । गाउँपालिकाले यहाँका ३२ ओटा विद्यालय मध्ये उत्कृष्ट सामुदायिक विद्यालयको रुपमा महादेवी आधारभूत विद्यालयलाई सम्मान गरेको हो । गाउँपालिकाले उत्कृष्ट सिकाई उपलब्धि तथा व्यवस्थापनको आधारमा उक्त विद्यालयलाई दुई लाख रुपैया र सम्मान पत्रले सम्मान गरेको हो । पौवादुङमा गाउँपालिका ५ सानोदुम्मामा रहेको यो विद्यालय गाउँपालिका भित्रको उत्कृष्ट विद्यालयमा पर्न सफल भएको प्रमुख प्रशासकीय अधिकृत नविन भट्टराईले बताए ।
सामुदायिक विद्यालयको शैक्षिक गुणस्तर सुधारको लागि प्रोत्साहन स्वरुप उत्कृष्टमा पर्न सफल विद्यालयलाई सम्मान गरेको गाउँपालिका अध्यक्ष किरण राईले जानकारी दिए । यहाँको शैक्षिक गुणस्तर सुधारको लागि गाउँपालिकाले योजनाबद्ध रुपमा काम गरिरहेको उनको भनाइ छ । ‘गाउँपालिका यहाँका सामुदायिक विद्यालयको शैक्षिक गुणस्तर सुधारको लागि योजनबद्ध रुपमा काम गरिरहेको छ’ अध्यक्ष राईले भने,‘शैक्षिक क्षेत्रमा राम्रो काम गर्ने विद्यालयलाई सम्मान गरेका छौँ ।यो सँगै विद्यार्थीहरुलाई पढ्ने उत्प्रेरणा थप्ने उद्धेश्यले गाउँपालिका अध्यक्ष छात्रबृति कार्यक्रम अन्तर्गत पुरस्कृत गर्दै आएका छौ ।’
