भोजपुर,२८ माघ ।
आगलागीका घटनाबाट कसरी वच्न सकिन्छ भन्ने विषयमा भोजपुरको टेम्केमैयुङ गाउँपालिकामा विपत जोखिम न्यूनिकरण सम्वन्धी एक दिने सचेतना कार्यक्रम गरिएको छ । विगतका दिनमा सदरमुकाम लक्षित हुने यस्ता खालका कार्यक्रम यस पटक भने ग्रामिण भेगमा गरिएको हो ।
वडा नं ६ कोटको खाल्डेमा डेमोमार्फत यस्ता घटनाबाट वच्न सकिने उपायको विषयमा जानकारी दिईएको थियो । साथै सर्वसारणलाई विषेश गरेर आगलागी सम्वन्धी भिडियो समेत प्रर्दशन गरिएको थियो । सहभागी स्थानियले कार्यक्रमले आगलागीबाट कसरी वच्ने भन्ने विषयमा सहज रुपमा जानकारी पाएको प्रतिक्रिया दिएका छन् ।
हिउँदको समय शुरु भएकोले आगलागीका घटनाबाट वच्ने उपायको विषयमा जानकारी दिने लक्ष्यका साथ कार्यक्रम गरिएको गाउँपालिकाका प्रवक्ता सुनिल राईले जानकारी दिनु भयो । कार्यक्रममा वोल्दै गाउँपालिका अध्यक्ष ध्रुवराज राईले आगलागीबाट वच्न सवैलाई सचेत रहन आग्रह गर्नु भयो । कतिपय आगलागीका घटना आफ्नै लापरवाहीले हुने भएकोले त्यसमा ध्यान दिन समेत सचेत गराउनु भयो । कार्यक्रम गाउँपालिकाको आयोजना र जिल्ला दैविक प्रकोप उद्धार समितिको सहयोगमा गरिएको हो । वडा अध्यक्ष सुर्य प्रसाद नेपालको अध्यक्षतामा भएको कार्यक्रममा कर्मचारी, जनप्रतिनिधि स्थानीय लगाएतको सहभागीता रहेको थियो ।
