भोजपुर, १६ फागुन । भोजपुरको रामप्रसादराई गाउँपालिकाले योजनाबद्ध विकासमा जोड दिन आवधिक पञ्च वर्षिय योजनासँगै सडक गुरु योजना निर्माण थालेको छ । यहाँ हुने विकास निर्माणलाई प्रभावकारी बनाउदै नमूना गाउँपालिका बनाउने उद्धेश्यले पञ्च वर्षिय आवधिक योजनासँगै सडक गुरुयोजना निर्माण थालेको हो । ‘कृषि, पर्यटन, पूर्वाधार:रामप्रसादराई गाउँपालिकाको समृद्धिको आधार’ भन्ने नाराका साथ आवधिक योजनासँगै सडक गुरु योजना निर्माण थालेको हो । गाउँपालिकालाई समृद्ध बनाउनको लागि कस्ता खालका कार्यक्रम सञ्चालन गर्ने भन्ने विषयमा आवधिक योजनासँगै सडक गुरु योजना निर्माण गरिरहेको गाउँपालिकाले जनाएको छ ।
आवधिक योजनाले गाउँपालिकाकाको भावी विकासको मार्गचित्र(रोड म्याप)तयार हुने गाउँपालिका अध्यक्ष थामबहादुर राईले बताउनुभयो । आवधिक तथा सडक गुरु योजना निर्माणले अवका दिनमा गाउँपालिकालाई कस्तो बनाउने भन्ने खाका तयार हुने उहाँको भनाइ छ ।
“रामप्रसादराई गाउँपालिकाको विकासलाई योजनाबद्धसँगै भावी दिनमा अझ प्रभावकारी रुपमा सञ्चालन गर्न आवधिक पञ्च वर्षिय योजनासँगै सडक गुरु योजना निर्माण थालेका छौँ ”अध्यक्ष राईले भन्नुभयो, “यसले गाउँपालिकाको विकासको मार्ग चित्र तयार हुनेछ । भावी दिनमा हुने विकासका कामलाई जनमूखी र प्रभावकारी बनाउन सहयोग पुग्ने छ । विना योजनाको कामबाट अपेक्षित उपलब्धि हासिल गर्न कठिन हुने भएकोले प्राथमिकताका साथ काम अघि बढाएका छौँ ।”
गाउँपालिकाले कृषिलाई प्राथमिकताका साथ अघि बढाएकोले कृषिलाई व्यावसायिक बनाउनको लागि कृषि रणनिति कार्यविधि पनि निर्माण भईरहेको उहाँको भनाइ छ । यसमा गाउँपालिका भित्र सञ्चालन गर्न सकिने योजना, यसबाट आउने प्रतिफल, गाउँपालिकाको हालको अवस्था र भावी दिनमा कृषिका क्षेत्रमा गरिने गौरवका योजनालाई समेटिने उहाँको भनाइ छ ।
गाउँपालिका भित्र गरिने हरेक विकासका कामलाई प्राथमिकता निर्धारण गरेर अघि बढ्न आवधिक योजना तथा सडक गुरु योजनाले सहजता थप्ने गाउँपालिकाका प्रमुख प्रशासकीय अधिकृत सन्तोष पोखरेलले बताउनुभयो । यहाँका सवै वडा तथा गाउँपालिकाको गौरवका योजनालगायत विषयलाई समेटेर आवधिक योजना निर्माण भईरहेकाले यसले संघ तथा प्रदेश सरकारमा बजेट माग गर्न सहजता हुने उहाँको भनाइ छ । आवधिक योजनामा वडा तथा पालिकाबाट सञ्चालन हुने आयोजनालाई आवश्यकता तथा औचित्यका आधारमा बर्गिकरण गरिएकोले यहाँको संस्थागत विकासमा ठूलो सहयोग पुग्ने उहाँको भनाइ छ ।
“आवधिक योजना भनेको यहाँको विकासको मार्ग चित्र हो ।” प्रशासकीय अधिकृत पोखरेलले भन्नुभयो, “यसमा यहाँका सवै विकासका गातिविधि समेटिने हुनाले संस्थागत विकासमा टेवा पुग्छ । आवधिक योजना निर्माण पश्चात माथिल्लो निकायमा आफ्नो योजना तथा कार्यक्रम प्रस्तुत गरेर आवश्यक बजेट माग गर्न सहज हुन्छ ।” आवधिक योजना तथा सडक गुरु योजना निर्माणको तयारीको लागि पाँचौँ चरणको दुई दिने आवधिक योजना तर्जुमा गोष्ठी सञ्चालन गरिएको छ । अवका दिनमा गाउँपालिकाले सञ्चालन गर्ने योजनाहरुको प्राथमिकिरणसमेत गरिएको छ । यसले योजनालाई प्रभावकारी रुपमा सञ्चालनको लागि सहयोग पुग्ने देखिएको छ ।
आवधिक योजना र सडक गुरु योजना निर्माणले यहाँको विकासलाई प्रभावकारीसँगै परिणाममुखी बनाउन सहजता थप्ने गाउँपालिकाका उपाध्यक्ष विरेन्द्र राईले बताउनुभयो । यो योजना निर्माण पश्चात यहाँको विकासको स्पष्ट मार्ग चित्र तय हुने भएकाले जनताको अपेक्षा अनुसारको योजना सञ्चालनमा मद्धत पुग्ने उपाध्यक्ष राईको भनाइ छ ।
“अवका दिनमा गाउँपालिकालाई कस्तो बनाउने भन्ने विषय आवधिक योजना र सडक गुरु योजनामा समेटेका छौँ”उपाध्यक्ष राईले भन्नुभयो, “धेरै चरणमा छलफल गरेर यहाँको विकासको प्राथमिकता निर्धारण गरेका छौँ । आवधिक योजनालाई आधार बनाएर अवका कामलाई जनमुखी तवरले अघि बढाउने हाम्रो लक्ष्य छ ।”
विज्ञहरुको समुहले स्थलगत रुपमा यहाँका ८ वटै वडामा पुगेर तथ्याङ्क संकलन गरेर आवधिक योजना र सडक गुरु योजना निर्माण गरिरहेको योजना विज्ञ पशुपति नेपालले बताउनुभयो । प्रारम्भिक चरणमा तथ्याङ्कमा समेटिएका विषय बस्तुहरुमा सरोकारवाला पक्षको सल्लाह, सुझावलाई समेटिएको उहाँको भनाइ छ । यो निर्माण पश्चात गाउँपालिकालाई पाँच वर्षमा कस्तो बनाउने निर्धारण हुने उहाँले बताउनुभयो ।
विना आवधिक योजना विकास निर्माणको काम सञ्चालन गर्दा कतिपय योजनाहरु स्थानीय जनताको आवश्यकता र औचित्य विपरित हुने भएकाले यसलाई विकासलाई व्यवस्थितसँगै प्रभावकारी बनाउन सहयोग गर्ने नेपालको भनाइ छ । सञ्चालन हुने विकासका योजनाहरुको स्थायित्व तथा त्यसको प्राथमिकिरणको लागि गाउँपालिकाले थालेको यो काम स्वागतयोग्य रहेको स्थानीयको भनाइ छ । पञ्च वर्षिय योजना निर्माण पश्चात गाउँपालिकाको योजना सञ्चालनमा सहजता हुने स्थानीयबासीले बताएका छन् ।
