भोजपुर, २० वैसाख ।
भोजपुरको टेम्केमैयुङ गाउँपालिका –६ कोटमा रहेको आहाले सामुदायिक वनमा आगलागी भइरहेको छ । आज विहानबाट शुरु भएको आगलागी अहिले १० हेक्टर बढी क्षेत्रफलमा फैलिसकेको वडा अध्यक्ष सूर्य नेपालले जानकारी दिए । आगो बस्ती भन्दा करीब १०० मिटर पर सम्म आइसकेकोले ३० देखि ३५ घर उच्च जोखिममा रहेको वडाध्यक्ष नेपालले जानकारी दिए ।
अहिले गाउँपालिका अध्यक्ष ध्रुवराज राई, स्थानीय लगाएतको टोलीले आगो नियन्त्रणको प्रयास गरिरहेको उनले जानकारी दिए । आगलागी भएको जानकारी पाउन साथ १२ बजे फष्ट रैफल गण भोजपुरका सह सेनानी ज्ञान बहादुर अधिकारीको कमाण्डमा नेपाली सेना सो तर्फ प्रस्थान गरेको छ । त्यस्तै सशस्त्र प्रहरी वल टक्सार गुल्मबाट सई मेघराज पराजुलीको कमाण्डमा १६ जना र नेपाल प्रहरीको प्रहरी निरीक्षक पाण्डवकुमार राजवंशीको कमाण्डमा टोली गएको जनाइएको छ ।
