भोजपुर, २६ वैशाख । वुधवार विहान आएको हावाहुरीले जिल्लाका विभिन्न ठाउँमा लाखौंको क्षति गरेको छ । हावाहुरीले भोजपुरको आमचोक गाउँपालिका –६ मा रहेको क्षमाकन्या माविको २ वटा भवनको छानो उडाउदा करिव २ लाख बराबरको क्षति भएको छ, भने सोही गाउँपालिकाको वडा नं–९ वडा कार्यालयको छानो उडाउदा एक लाख बराबरको क्षति भएको प्रहरी चौकी बालंखाले जनाएको छ।
त्यस्तै पौवादुङ्मा– ५ सानोदुङ्मा स्थितमा महिला सहाकरी भवनको टिनको छानो उडाउदा करिव एक लाख पचास हजार बराबरको क्षति भएको छ ।
त्यस्तैगरी हतुवागढी गाउँपालिका –९ गैरीगाउँ बस्ने मदन समाल मगरको घरको छानो उडाउदा ७० हजार वरावरको क्षति भएको जिल्ला प्रहरी कार्यालय भोजपुरले जनाएको छ । जिल्लाका अन्य विभिन्न ठाउँमा पनि हावाहुरीको कारण क्षति भएको स्थानियले वताएका छन् ।
